صوت الفؤاد

اول حاجة كل سنة و انتم طيبين بمناسبة عيد الاضحى المبارك .. عيد سعيد مليئ بالبهجة و السعادة على الجميع ان شاء الله ..

هي التدوينة في الاساس مكتوبة عشان الجملة اللي فاتت بس .. لكن بما ان المدونة كلها شخصية فلازم نصدعكم بشوية اخبار سريعه

في تدوينة سابقة كنت حطيت من ضمن الأهداف للسنة الجديدة ” أبدأ أجهز شقتي “ و الحمد لله رب العالمين بدأت أول خطوة الأسبوعين اللي فاتوا وبقى للشقة جدران و سقف

الأسبوعين اللي فاتوا دول كانوا من أكثر الأسابيع اللي انضغطت و تعبت فيها جداً .. الاشراف على العمال و المباني مع الشغل مع الامتحانات الكتييييرة اللي كانت ورانا لان الدكاتره في الكلية خايفين ان اجازة العيد تمتد بسبب المرض … لكن الحمد لله رب العالمين مرت على خير

على الرغم من ضغط الأسبوعين اللي فاتوا إلا أني أخذت خطوة مهمة سعيد بها جداً أياً كانت نتائجها إلا أني سعيد اني قمت بيها و أفتكر ان اللي عملته هو الصح … >> محدش فاهم حاجة بس مش مهم كل شئ في وقته

حالياُ في أفكار كتير عن تطوير شغلي و تحويله من عمل فردي لشخص واحد الى شئ أكبر .. الأفكار كتير لكن محتاج ارتبها و اختار الافضل و الانسب بينها .. الموضوع هيبقى محتاج لوقت ومال و جهد .. لكن لا ضرر من خوض التجربة حتى ولو كان فشلها – لاقدر الله – هيكون مصحوب بخسائر

دعواتكم بالتوفيق و عيد سعيد على كل الأهل و الأقارب و الأصحاب و الأحباب ..

عيد سعيد عليكم جميعاً

طبعاً محدش فاهم حاجة   بس أنا سعيد .. دعواتكم بس

أول مره أعرف عن لقاءات هواه التقنية كان عن طريق تويتراية لحازم خالد .. بعدها شوفت الجروب الخاص بيها على جوجل و بعض الصور للقاءات السابقة .. في رمضان اللي فات وصلني دعوه من حازم عن طريق الفيس بوك لحضور السحور الجماعي لهواة التقنية .. لكن لأني مش من سكان القاهرة فكان من الصعب أني أحضر … لكن في أخر رمضان وصلني دعوة تانية من حازم ( الراجل ده موجب معانا جامد ) لركوب الخيل الجماعي لهواة التقنية في العيد وبعد ركوب الخيل بيبقى في لقاء لتناقش أمور تقنية  .. و بما أننا في العيد و اللقاء بدري من أول اليوم قررت الحضور و نسقت مع حازم عشان أقابله في مكان أكون عارفة عشان ماتوهش في القاهرة بس

في الصباح التقيت بحازم .. أعرف حازم عن طريق النت من زمان ومؤخراً لما بدأ يستخدم تويتر تعرفت عليه أكثر لكن اللي فاجئني أني كنت متوقعه أكبر من كده بكتيييير .. طلع أكبر مني بحاجة بسيطة على عكس ماتوقعت و قابلت أحمد توفيق و ياسر سبيد ودي المره الأولى اللي أتعرف عليهم …. كنت أتوقع أن يكون العدد أكبر .. من خلال الصور اللي شفتها للجروب بيبقوا خماشر ثمناشر واحد بس قلت يمكن خايفين يركبوا خيل و الشباب قالوا في ناس هتيجي على اللقاء مباشرة بعد ركوب الخيل …

أكمل قراءة التدوينة »

من أصعب الأشياء أنك تكون مشرف على تشطيب بيت و تكون ملزم أنك تتعامل مع العُمال و طبعاً لازم تكون متواجد معاهم معظم الوقت .. تخيل بقى كم الوقت الضائع في حاجة زي كده .. أخوكم و للأسف من سنتين أتحط في الموقف ده .. الإشراف على تشطيب بيتنا الجديد … فقررت ألاقي حاجة استغل بيها الوقت الضائع ده .. طبعاً ماينفعش أخذ اللاب توب في مكان ولا فيه كهرباء و لا نت .. و أيامها مكنتش مرتبط بمشاريع أو شغل ولا حتى تدوين .. كنت لسه حر

فكانت الفكرة أني أعمل نافورة مياه أحطها في مدخل البيت خصوصاً لما لقيت أن أسعارها فوق 2000 جنيه !!!!

كالعادة لازم أرسم المشروع على الورق .. و بعد ما حددت كل حاجة بدأت في الشغل .. أخذت مكان في البيت و عملته ورشة للأسطى فؤش ومحدش عارف أنا بعمل ايه .. قالوا باصنع صاروخ .. أهم حاجة أنها مكلفتنيش حاجة – اللهم إلا حاجات بسيطة جداً -  لأني إستغليت أشياء كانت متوفرة عندي مش مستخدمة بالإضافة أني كنت بستغل الخامات اللي كنت بشتريها لشغل البيت .. الشغل عليها أخذ وقت طويل لحد ما خلصتها .. كالعادة الكسل سبب رئيسي في التأخير بس الحمد لله خلصتها في الأخر و ان كانت لحد دلوقتي ناقص أني أركب الإضاءة بتاعتها

أسيبكم مع بعض الصور : أكمل قراءة التدوينة »

سيقام احتفال بيوم حريةالبرمجيات لمدة أسبوعين أبتداءا من الأول من سبتمبر في كليةالهندسة جامعة الإسكندرية .
ويوم حرية البرمجيات هو احتفال عالمي و تعليمي الهدف الأساسي من وراء هذه الاحتفالية هي تشجيع مستخدمي الحاسب للتعرف على البرمجيات الحرة ذات المصدر المفتوح بالإضافة إلى التعرف على المجتمعات التي تقوم بتطويرها و نشرها حول العالم و علي كيفية المشاركة في هذه المجتمعات .

لمزيد من المعلومات

بإذن الله هحاول أحضر بكره اولى فعاليات الحدث .. المشكلة اني ماروحتش إسكندرية من رابعه إبتدائي يعني الواحد هيلطش لما يشبع ..

للأسف مش هقدر احضر كل فعاليات الحدث على مدار الأسبوعين لأني بعيد عن الأسكندرية لكن إن شاء الله هحاول أحضر معظمها ..

هحدث التدوينةعلى مدار الأسبوعين لأضيف الايام اللي هحضرها ..

يلا أشوفك هناك

تحديث : حضرت النهارده اولى فعاليات الحدث .. الوصول للمكان مكنش صعب لكن الصعب كان الدخول .. لفيت على ابواب الكلية كلها وكل حراس الأمن يقولوا مؤتمر إيه ؟؟ ومعندناش تعليمات عن حاجة زي كده ؟ حتى عند الباب اللي كان موضح في رساله المنظمين الموجود في شارع لطفي السيد .. المهم بعد مداولات دخلنا الحمد لله و أعتذر حارس الامن .. كان في تخبط في التنظيم لان الكلية فيها تصليحات صراحة مقدرش ألوم الشباب المنظمين لاني عارف معنى انك تنظم حدث في كليه يعني ايه وحصلت معايا كتير في الفعاليات اللي بنظمها في Computality .. الاول كان في تعريف بالحدث و الجدول الخاص بيه و بعدين محاضرة عن فكر المصادر المفتوحة .. لكن التنظيم و الفعاليات النهارده مكنتش في المستوى اللي كنت متوقعه و أتمنى ان باقي الفعاليات تكون أفضل ..

سعدت اليوم بلقاء الأخ عبدالرحمن ( SolidSnakeGTI )  و مجموعة من شباب فريق الكات بهندسة المنصورة .. أحمد مسعود و إسلام محمود ومن شباب تويتر حسام عادل ..

إذا كان في امكانية لحضور فعاليات تانية للحدث هكتب هنا في المدونة قبلها و على حسابي في تويتر