صوت الفؤاد

كل سنة و انتم طيبين .. زي مابيقولوا الاوقات السعيدة بتعدي بسرعه .. عشان كده محستش بالاجازة .. يوم السبت يبدأ العام الدراسي الجديد … خلينا أقولكم انا بكره ايه في كليتي وبحب فيها ايه ..

بكرهها لانها …

• نظام الدراسة في كليتي هو نظام الساعات المعتمدة .. النظام ممتاز ومعمول بيه في كليات كبيرة …  بس عندنا بيطبقوه غلط فده عاملنا معاناة كبيرة جداً كطلاب .. تصدقوا لحد دلوقتي مش فاهم النظام عندنا .. أقرأ اللائحة ألاقي حاجات غير اللي بتطبق خالص !!
• لاننا بنطبق نظام الساعات غلط .. ففي أيام بتضطر أقعد فاضي في الكلية أكثر من 5 ساعات إنتظار بين المحاضرات !!
• في أول أسبوعين من كل ترم لازم نشوف الويل و العجب و إحنا بنسجل مواد الترم الجديد … بتشوف نظرة واحدة على وجوه الطلاب .. علامة إستفهام كبيرة و جنبها علامة تعجب أكبر وهما ماسكين جدول المواد بالمواعيد و كله متعارض مع كله ومش عارفين يسجلوا إيه !!
• قبل الاختبارات ولما ينزلوا الجدول المقترح .. بتشوف مهازل عجيبة .. 4 أو 5 مواد نازلين في يوم واحد وفي معاد واحد وفي مكان واحد !!! .. ونقدم تعارضات و الجدول يتغير على اقل تقدير 5 مرات لحد ليلة الامتحان ممكن يتغيرعادي .. ولازم نبقى على إطلاع بأي تحديث يحصل على الجدول و ده مسؤليتك طبعاً .. المفروض يقدموا خدمة الإشتراك في خدمة تنبيهات الجدول على الميل و الموبايل عند حدوث اي تعديل   !!
• الدكاتره و الموظفين بيعاملو الطلاب على أنهم كائنات من نوع أخر .. بس مش قادر لحد دلوقتي أحدد النوع ده بس اللي متأكد منه ان النوع ده مش “  البشر “
• مدرجات ومعامل الكلية غير صالحة للإستخدام الأدمي !!
• كافتيريا الكلية بقت مكان .. ( للهئ و المئ ) على رأي أحمد السقا .. و العجيب ان في شباب بيجوا من بيوتهم مخصوص عشان يقعدوا في الكافتيريا !!
• مكتبة الكلية .. مش عارف دي مكتبة بجد ولا إيه .. الشئ الممتاز جداً .. إن موظفين المكتبة مابيسمحوش بأي صوت جوه المكتبه .. بس ماتفتكرش ان المكتبه هتبقى هادئة لانك هتسمع بقى الموظفين نفسهم وهما بيتكلمو مع بعض بصوت عااااااااااالي وضحك !!
• بندرس في الكلية مواد حاسب منتهية الصلاحية !! .. ولو انت في شعبة مختلطة مثلا رياضيات وحاسب او فيزياء وحاسب .. هتقعد الأربع سنين تسأل نفسك هما أمتى الفرعين دول هيلتقوا و احس انهم بيكملوا بعض ؟؟ ولو مابيكملوش بعض يبقى بدرسهم مع بعض ليه ؟؟
• طلاب علوم من الذكور بينطلبم في الجيش ظباط 3 سنين !!
• كلمة النشاط الطلابي في الكلية عندنا معناها .. حفلات .. على أساس انها بتظهر المواهب الشابه !!
• لو جيت تعمل نشاط طلابي محترم .. لازم تشوف الويل و العذاب .. تصاريح و تخاريص و تمضي الورق من أكثر من جهة و أكثر من مسئول .. طول ما في مكان في الورقة أبيض مفهوش أمضى .. أعرف إن الإجرائات لسه مخلصتش !
• الكلية أكبر مثال على الروتين و الكوسة المنتشرين في البلد … لما تيجي تعمل نشاط معين او حاجة يقلولك ضد اللائحة مع ان أغلب قرارتهم مش ضد اللائحة بس دا يمكن ضد الدستور
• مش عارف مين العبقري اللي جمع كليات زي ( الطب و الهندسة و حاسبات و علوم و أداب و تجارة و حقوق ) في منطقة واحدة !! .. الزحااام بيبقى رهيب و المواصلات بتبقى ماشاء الله مفيش أحسن من كده .. نظام شعبطه .. إذا لحقت .. بس بفكر أجيب توكتوك عشان أستريح من المواصلات 
• لازم الظابط بتاع الأمن يوقفني كل يوم و يشوف شنطة اللاب ويفتحها .. لحد مره ما اتخنقت وقلتله ” مجبتش المتفجرات معايا النهرده ” وكويس انه كان راجل طيب و يومها عدا على خير
• مفيش أي خبر أو قرار إسمه نهائي إلا لما يبدأ يتنفذ .. يعني لو كنت واقف مع اي حد من إدارة الكلية وقال هنعمل كذا وكذا .. وواحد زميلك سألك بعدين هما يعملوا إيه قله .. أنا سمعته قال كذا وكذا بس مش متأكد
• مجموعة كبيرة من زملائي فاكرني هبقى معيد و بيقولولي يا دكتور الغلابة مش فاهمين انها علاقة عكسية .. يعني الطالب اللي شغال وظاهر مبيتعينش غفير حتى .. لكن اللي نايم مع نفسه و قاعد يحفظ ويصم .. دول اللي بيتعينتوا !!

أنا تعبت .. كفاية كده لتعقد من الكلية ولا حاجة

بحبها لأنها :

• بدرس في شعبة الحاسب .. ولو بندرس حتى نظام Dos هيبقى افضل بالنسبة ليا من أني أدرس محاسبة ولا تاريخ الشعر في الجاهلية ولا أي تخصص تاني ..
• فيها اساتذة بعتز بمعرفتهم .
• فيها زملائي و أصدقائي اللي بحبهم و بعتز بصداقتهم جداً .
• فيها مجموعة Computality .. اللي ساهمت في تأسيسها و اللي من خلالها بحاول أفيد غيري و بعمل شئ بحبه .

الموضوع مفتوح لكل الطلاب يشاركونا باللي يكرهوه وبيحبوه في كلياتهم .. خصوصاً طلاب كليتي العزيزة .. وربنا يستر علينا و عليكم