ازيكم ياشباب ..
بقالي فترة مكتبتش حاجة هنا و بقالي فترة اكبر محدثتش مدونتي التقنية ” المُعاصر ” بتدوينات جديدة .. لكن الايام دي و بعد ما خلصت موضوع المباني الأخير ده و حياتي متلخبطة شوية بين امتحانات ما بتخلصش – واول مره يكون في لخبطة في الامتحانات بالشكل ده و مواعيدها ووجود اكثر من امتحان وكل ده بسبب الانفلونزا – و بين شغلي اللي مش عارف اركز عليه و أديله وقت كافي و بين التزامات و مواضيع تانية كتير … على كل حال بحاول الايام دي انظم وقتي و احاول ارتب حياتي بشكل افضل .. دعواتكم ^_^
الأسبوع اللي فات اعلنت على المُعاصر اني هلقي محاضرة في كليتي ضمن نشاطات مجموعة Computality .. المحاضرة كانت بعنوان The Internet Revolution و الحمد لله من حسن حظي ان اغلب محتواها كان من محاضرة Web Day اللي المفروض كنت هديها في شهر 5 اللي فات بس اتلغت بسبب تعسف اداري في الكلية .. فما اخذتش وقت كبير في تحضيرها
دي مش اول محاضرة ليا في الكلية .. السنة اللي فاتت حاضرت محاضرتين .. لكن في الاتنين كنت ببقى متوتر بشكل كبير قبل المحاضرة خصوصاً ان بيحضر المحاضرات دي اعضاء هيئة تدريس من الكلية .. لكن المرادي الحمد لله كانت أفضل بكتير من كل المرات السابقة .. مكنش في اي توتر كنت بتكلم بثقة كبيرة و اسلوبي في الكلام و الشرح أفضل بكتير .. تفاعلي مع الحاضرين أفضل من كل مره .. تعليقاتي اللي بتكسر جو المحاضرة الرسمي بحيث تكون المحاضرة اقرب للحاضرين .. قعدت ساعتين اتكلم 
أختي الصغيرة اصرت تحضر معايا المحاضرة .. وانا عجبني الموضوع اهو من باب الدعم العائلي ..
الحمد لله كان تحضيري للمحاضرة كويس .. شرائح العرض كانوا اكثر من 100 بالاضافة الى 5 فيديوهات .. اتكلمت عن الانترنت كمعني وكفكرة و عن طرق الاتصال بالانترنت و الانواع زي dial-up و dsl و عن المواقع و مكان تخزينها .. السيرفرات و الداتا سنتر و الدومين نيم و معنى الويب و تاريخه و الويب 1.0 و شركات الدوت كوم و الويب 2.0 كمفهوم و فكرة و الشبكات الاجتماعية و استعرضت عدد منها FaceBook , YouTube , Wakoopa , Flickr , Twitter و غيرها و خدمات الويب 2.0 العربية و إستعرضت بعضها ..
عدد الحاضرين كان كويس مع ان في محاضرات في نفس موعد محاضرتنا .. كل شئ كان تمام الا المايك في المدرج علق معايا أكثر من مره خصوصاً لما جيت أتكلم عن تويتر وقف خالص فسبته و كملت المحاضرة من غيره ( بيريح دماغه ) .. كمان كنت بتحكم في السلايدز عن طريق الموبايل بإستخدام اتصال بلوتوث بين الموبايل بتاعي و اللاب توب لكن الاتصال فصل أكثر من مره .. !!
فيديو عرضته قبل المحاضرة عن تاريخ و تطور الانترنت :
أكمل قراءة التدوينة »
