27 فبراير 2010
مصنف في شخصي | 6 من التعليقات »
هيــــــــــــــــــــــــــــه >> بيتنفس الصعداء 
الحمد لله إنتهت التربية العسكرية .. يارب انجح بس مع اني كنت ملتزم طول الدورة يعني مفيش غياب و إلتزام في الطوابير و مكنتش مشاغب و في الامتحان النظري حليت كويس قبل ما يحلولنا الامتحان !! بس مش مطمن !
انتهت العسكرية و بدأ ترم جديد .. على عكس أغلب دفعتي في الكلية فده مش الترم الأخير ليا .. أنا متأخر عن زمايلي شوية في الساعات كان ممكن أخلص في الترم الصيفي بس انا هكمل السنة الجاية كلها إن شاء الله .. لأسباب كتير ممكن أبقى اتكلم عنها بعدين !
اللي متبقى لي في الكلية مواد رياضيات و مواد تخدم التخصص بعد ما خلصت مواد الحاسب الإجبارية و الإختيارية تبقى بس مادة شبكات الحاسب اللي هسجلها السنة الجاية ان شاء الله .. دي المواد اللي سجلتها الترم ده مع بقاء خيار الإنسحاب من بعضها قائم !
- معادلات تفاضلية 2
- تحليل رياضي 2
- ميكانيكا عامة
- برمجة غير خطية
- نظرية المتغير المركب
- ديناميكا حرارية
- خواص مادة
- دراسات بيئية
طبعا من اول ما دخلت الكلية و انا بسأل أنا طالب بدرس في تخصص رياضيات بحته و علوم الحاسب ليه أدرس مواد زي علم المعادن و علم البلورات و خواص المادة و موجات و صوتيات و كهرومغناطيسية و ديناميكا حرارية وووو تحت مسمى أنها مواد تخدم التخصص .. طيب حد يقولي بتخدم التخصص إزاي إذا كان التخصص نفسه مش بيخدم بعضه يعني مواد الرياضيات اللي بندرسها مش مرتبطة بمواد الحاسب !!
بعيداً عن الكلية تفكيري مشغول جداً الايام دي بحاجات كتير جدا بحاول أوصل فيها لقرار .. أدعو الله ان ييسر لي ما يحب و يرضى وأن يكتب لي فيها الخير .. دعواتكم ^_^
تحديث : حذفت نظرية المتغير المركب و ديتاميكا حرارية و درسات بيئية و سجلت علم البلورات و دراسات اسلامية 1
10 فبراير 2010
مصنف في شخصي | 6 من التعليقات »
إنتهت إمتحانات الترم الحمد لله .. أغلب الامتحانات كانت كويسه ماعدا مادة واحدة إضطررت للإنسحاب منها ..الحمدلله على كل حال
إستنيت نهاية الامتحانات عشان الواحد يستريح شوية قبل بداية الترم الجديد و عشان اقدر أرجع لشغلي و تصاميمي اللي كنت موقفها بسبب الإختبارات لكن للأسف أجازتي كانت يوم واحد بس 
بسبب التربية العسكرية !!!
التربية العسكرية إجباري على طلاب الجامعات و بتستمر أسبوعين يعني أجازة نصف العام كلها .. و الأهم انها يومياً بتبدأ من 8 إلى 2 أو 3 بعد الظهر !!!
نروح الكلية الصبح قبل 8 عشان نقف في طابور عسكري – أفتكر أني أخر مره وقفت فيها في طابور كانت في الثانوي أيام طابور الصباح – و يستمر الطابور ساعتين أو ثلاثة على حسب مزاج الجندي او بمعنى تاني بمدى إلتزامنا في تنفيذ الأوامر زي ” صفا ” إنتباه ” “لليمين دور” ” سلام التمام ” و أهم حاجة نشيد الجيش و نشيد بلادي … لحد ما يوصل العقيد و ندخل نأخذ محاضرات عن الجيش و الدفاع و الصراع العربي الإسرائيلي و حرب أكتوبر و إستراتيجيات الحرب وووووووو ..
كل مره العقيد يقول أي سؤال انا حاضر ليه بس داخل الموضوع ” يعني محدش يتكلم في السياسة ” .. بس أنا نفسي أسأله سؤال بسيط جدا : إيه دور المؤسسة العسكرية لو حصل فراغ مفاجئ في السلطة و هل ممكن المؤسسة العسكرية تفرض أو تساعد مرشح او شخصية معينه ؟؟ .. بس مش بعيد بعد السؤال ده يسقطني في التربية العسكرية أو يرد عليا ” أنت إتجننت يا أبني هو في رئيس بيموت ”
هيبقى ليا كلام تاني عن التربية العسكرية بعد ما تخلص إن شاء الله .. الساعه دلوقتي 6:30 ألحق أقوم أجهز و ألبس زي العسكرية ” القميص اللبني و البنطلون الأزرق ” و ألحق الطابور بدل ما أتحسب غياب و اسقط في العسكرية !
دعواتكم
