أول مره أعرف عن لقاءات هواه التقنية كان عن طريق تويتراية لحازم خالد .. بعدها شوفت الجروب الخاص بيها على جوجل و بعض الصور للقاءات السابقة .. في رمضان اللي فات وصلني دعوه من حازم عن طريق الفيس بوك لحضور السحور الجماعي لهواة التقنية .. لكن لأني مش من سكان القاهرة فكان من الصعب أني أحضر … لكن في أخر رمضان وصلني دعوة تانية من حازم ( الراجل ده موجب معانا جامد 
) لركوب الخيل الجماعي لهواة التقنية في العيد وبعد ركوب الخيل بيبقى في لقاء لتناقش أمور تقنية .. و بما أننا في العيد و اللقاء بدري من أول اليوم قررت الحضور و نسقت مع حازم عشان أقابله في مكان أكون عارفة عشان ماتوهش في القاهرة بس
في الصباح التقيت بحازم .. أعرف حازم عن طريق النت من زمان ومؤخراً لما بدأ يستخدم تويتر تعرفت عليه أكثر لكن اللي فاجئني أني كنت متوقعه أكبر من كده بكتيييير .. طلع أكبر مني بحاجة بسيطة على عكس ماتوقعت 
و قابلت أحمد توفيق و ياسر سبيد ودي المره الأولى اللي أتعرف عليهم …. كنت أتوقع أن يكون العدد أكبر .. من خلال الصور اللي شفتها للجروب بيبقوا خماشر ثمناشر واحد بس قلت يمكن خايفين يركبوا خيل و الشباب قالوا في ناس هتيجي على اللقاء مباشرة بعد ركوب الخيل …
ركوب الخيل كان في الأهرامات و الشباب بقوا فرحانين جداً لما عرفوا ان الهرم مفتوح النهاردة للمصرين !!! .. و أنا كنت مستغرب جداً .. هو العيد ده للسياح ولا للمصريين ؟؟ مش فاهم أنا يعني يبقى عيد للمصريين هيخرجوا فيه ويقلولك الهرم للسياح .. اه يمكن السياح كمان كانوا صايمين طول رمضان في بلادهم وجايين يعيدوا عندنا .. !!!
ركبنا الخيل ودي مش المره الأولى اللي اركب فيها خيل .. اول مره أركب فيها خيل كانت وانا عمري 4 سنين تقريباً بما أن أعمامي و أخويا الصغير من هواة الخيل بشكل جنوني .. بس انا مش من المغرمين بيهم يعني بركبهم على فترات متباعده .. بس الجديد كان انك تجري بالخيل في الصحراء وتطلع بيه هضبة عالية …. شغل فيلم وا إسلاماه كده
مكنتش عارف افتح عنيا من الشمس
حازم خالد ممتطياً جواده تفاحة …. مش فاكر كان إسمه تفاحة ولا دلوعة
محدش يقول الصورة مركبة .. أنا مغمق منطقة الاهرامات عشان تظهر بس
خلصنا ركوب الخيل .. السيئ ان واحد من الشباب وقع بعد عناد بين حصانين .. بلاش نقول هو مين بس هو مش أنا ولا حازم ولا ياسر … روحنا بعدها صلينا الظهر في المسجد وقعدنا لحد ما خادم المسجد قالنا يلا عشان هنقفل المسجد ؟؟ .. هي المساجد بتغلق ليه ؟ لو واحد ملحقش وقت الصلاة وهيصلي بعدها يصلي فين ؟؟؟ .. الواحد خايف مره يروح يصلي يلاقي المسجد مغلق و معلاقين لافته .. مغلق للصلاة إلحق بنا …. زي المحلات كده !!
انتقلنا بعدها لمطعم و انتظرنا باقي الشباب و بعد اتصالات بقى من الواضح اننا هنكمل إحنا الأربعه بس 
.. إتغدينا .. و اتكلمنا في مواضيع كتيرة منها مسابقة أرابيسك و العمل الحر و طرق تنظيم العمل و موقع تكويد ومسلم تيوب وتصميم حازم الجديد لمدونته … و الكتب اللي انا شغال عليها .. و الكتب اللي شغال عليها حازم .. و إغتبنا في انترنت اكسبلورر 6 ومواضيع تانية كتير …
كنت اتمنى أني اقابل عمرو فهمي .. قابلت عمرو قبل كده في ووردكامب و ديمو كامب .. لكن لظروف خاصة مقدرش يحضر و كنت متوقع اقابل هاوي PHP بس مقدرش يحضر أكيد كان بيحضر نفسه نفسيا لهزيمة الزمالك كالمعتاد ما تخفش يا أبو حميد في أمل ان الزمالك يكسب ماتش في يوم من الايام بس لو نزل من الدور الممتاز حتى دى ما أضمنهاش
كان في اقتراح ان لقاءات هواة التقنية تبقى شهرياً .. لكن بعد ما ركبت المترو وانا مروح ولقيت الجو مكتووووووم وفكرت ان لو حد راكب عنده المرض إياه .. يبقى الواحد يخليه في بيته أأمن .. ربنا يستر من المواصلات مع المرض ده ..!
لقاءات هواة التقنية حاجة كويسه جدا إنها تجمع ناس من بلد واحدة مهتمين بنفس المجال .. ده بيفتح الباب لمناقشات مفيدة و لتبادل الخبرات و ظهور مشاريع جديدة .. أتمنى أنها تستمر إن شاء الله و تنظم بشكل أكبر ..
صور لقاء العيد 2009 على حسابي في فليكر
—————————————————————-
على الهامش : .. حبيت أسجل فرحتي الشديدة .. بخسارة فاروق حسني في إنتخابات اليونيسكو .. بجد الراجل ده مكنش ينفع يكسب ويتقال بره ده من مصر ويتحط إسمه جنب زويل و الباز و يقولوا عليه من اللي رافعين راس البلد في الخارج .. بقول لكل المصريين ألف مبروك .. المفروض نأخذ 4 ايام كمان عيد عشان الخبر ده
السلام عليكم
تدوينة جميلة يا فؤاد بس سألت أسئلة كتير فيها
زي الهرم المقفول للمصريين فى العيد، ده العادي بتاع كل سنة لآن زاهي حواس بيخاف على الأهرمات من المصريين.. بس بيكون مفتوح عادي باقي السنة وأكيد كانت مفاجأة انهم فتحوه السنة دي.
أما بخصوص الجوامع فدي فرصه أجيب في سيرة الاخوان (أوعى تكون منهم) لأن بسبب تجمعهم فى التسعينات بالمساجد واخفاء بعضهم للأسلحة بداخلها صدر قرار باغلاق جميع المساجد بعد الانتهاء من الصلاة بفتره قصيرة ومفيش غير كام جامع كبير الي واخدين ترخيص انهم يفضلوا مفتوحين طول النهار.
وبالنسبة لفاروق فمن الواضح ان 99% من المصريين فرحانين لخسارته مش انت لوحدك
أيه يا بطل لاقة الأخوان بموضوع المساجد ده ؟ هو على فكرة ممكن يسيبو الأسلحة في المساجد ويرجعلوها بعد الصلاة
انا مش منهم ولكن بقدر دورهم في المجتمع
المهم اليوم كان كويس، واحب أقول ان دي ثالث مرة تقريباً نطلع خيل والأجتماعات الشهرية انت بالفعل قائمة في 2008 ولكن وقفت من اخر السنة الي فاتت
كان في يوم كمان ولكن للأسف مكملش اننا كنا عيزين نطلع دار أيتام في يوم اليتيم ويكون معانا أجهزتنا وانترنت ونديهم محاضرات خفيفة في أساسيات الكمبيوتر والأنترنت ولكن للأسف فشل اليوم
شكراً على التدوينة دي
تدوينه جميله فعلآ
وانا الحالفنى الحظ ووقعت من على الفرسه وزى مابيقولوا ميقع إلا الشاطر
كانت مبارزه بين دلوعه الركبها حازم خالد وتفاحه الانا ركبها ولكن تفاحه مش كانت بتجرى كانت بتطير مش عارف عايزه تروح فين ومش عايزه تقف الهى بعد لما وقعت راحت وقفت جنب دلوعه وانا عرفت السر المره الجايه اكيد انشاء الله اكون اتعلمت
بس الحمد الله كان يوم لذيذ واتعرفت على فؤاد وياسر وانشاء الله نكررها تانى رغم انى كنت متوقع انه يكون فيه ناس كتير بس خيرها فى غيرها انشاء الله
كان نفسى الصراحه اخش الهرم بس فعلآ يارتنا دخلنا الهرم ابل الخيل وكان نفسى اطلع الهرم بس مكنش فيه حد يشجع تخيلوا كدا نطلع مره وناخد صوره كولنا فى نصف الهرم او جنب ابو الهول انشاء الله المره القادمه
شكرآ يا فؤاد على التدوينه الرائعه دى
الحمد لله انكوا اسمتعتوا باللقاء الجميل ده
, والله كان نفسي أشارك معاكوا .. بس للأسف العملية لسه لحد دلوقتي تعبان شوية ..
|| هو على فكرة ممكن يسيبو الأسلحة في المساجد ويرجعلوها بعد الصلاة
||
مش فاهمك يا حزوم
احم احم احم
أحمد مظهر جيه يا ولاد , تدوينة رائعة كروعة اليوم , اتعرفت بشخصيات اعتز بمعرفتهم و صداقتهم
و بجد استفد من اليوم بسماعي لمنقاشات حازم و فؤاد و توفيق
و بأذن الله تتكرر فى الأيام القادمة
|| فؤاد اي نيد يور ميل تو سبيك واذ يو