و قالوا إتقى شر الحليم إذا غضب .. لانه لو غضب هيجيب عليها وطيها…
مبروك للجزائر و مبروك لمصر اللي بحب تراب أراضيها …
وكل شئ خير و أكيد الصعود مكنش الخير لينا وليها …
يمكن لو كنا صعدنا كانوا ذبحوا ولدنا عندهم و راحوا فيها ..
ساعات بتكون الخسارة مصدر إلهام ..!!
أنا مش من متابعين الكره ولا من المتعصبين ليها .. غير لما يكون ماتش للمنتخب ولو ودي حتى … تقريبا مبتفرجش على أي ماتشات غير للمنتخب .. طبعاً وزي اي مصري كنت أتمنى أن نصعد لكأس العالم .. ورغم الخسارة وعدم الصعود .. إلا أني مش حزين ولاغاضب .. كالعادة قلت جملتي المعتادة اللي مبتفارقنيش في أي موقف .. ” خير خير .. كل شئ خير ”
مبروك لينا في مصر .. شخصياً فخور بالشعب اللي ساند منتخبة … فخور بالإعلام الهادف اللي ساند الفريق … فخور بالمنتخب و لاعبيه اللي لعبوا لحد أخر اللحظات و قدموا عرض رائع ..
أبارك للجزائر الفوز و التأهل .. و أتمنى لها التوفيق و أن تكون واجهة مشرفة للكرة العربية و الأفريقية ..
اللي حصل قبل و بعد الماتشات .. محتاج واقفة تأمل كبيرة جداً .. المشاحنات و الصدامات كل ده عشان ماتش كوره .. طيب لو حصل شئ أكبر شوية هيكون إيه الوضع .. هل فعلاً ده إحساس الشعوب نفسها ولا ده نتاج التعبئة الإعلامية من إعلام غير هادف أبداً سواء كان هنا في مصر او هناك في الجزائر ..
ولا ممكن ننظر للموضوع من جهة نظرية المؤامرة .. يعني في دول و ناس لها مصالح في كده فإستخدمت وسائل عديدة و منها طبعاً الاعلام المأجور عشان تزود الأزمة .. كتطبيق للبروتوكول الثالث عشر من بروتوكولات حكماء صهيون :
تمرير القوانين الصعبة ثم استدراج الرأي العام إلى مشكلة جديدة لصر ف انتباههم عن القانون الذي تم تمريره مع تعقيد المسائل السياسية – إلهاء الجماهير الرعاع بأنواع شتى من الملاهي والألعاب والتحكم بنتائجها بما يخدم إثارة الرأي العام وإلهاب حماسه وشغله عما يحال له .
الموضوع محتاج تفحص و دراسة كبيرة .. لأن اللي حصل بين شعبين مفيش بينهم أي خلافات أو عداوات سواء سابقة او حالية ممكن يحصل مع شعوب و بلاد غيرها كتير ..
كل سنة و انتم طيبين .. زي مابيقولوا الاوقات السعيدة بتعدي بسرعه .. عشان كده محستش بالاجازة .. يوم السبت يبدأ العام الدراسي الجديد … خلينا أقولكم انا بكره ايه في كليتي وبحب فيها ايه ..
بكرهها لانها …
نظام الدراسة في كليتي هو نظام الساعات المعتمدة .. النظام ممتاز ومعمول بيه في كليات كبيرة … بس عندنا بيطبقوه غلط فده عاملنا معاناة كبيرة جداً كطلاب .. تصدقوا لحد دلوقتي مش فاهم النظام عندنا .. أقرأ اللائحة ألاقي حاجات غير اللي بتطبق خالص !!
لاننا بنطبق نظام الساعات غلط .. ففي أيام بتضطر أقعد فاضي في الكلية أكثر من 5 ساعات إنتظار بين المحاضرات !!
في أول أسبوعين من كل ترم لازم نشوف الويل و العجب و إحنا بنسجل مواد الترم الجديد … بتشوف نظرة واحدة على وجوه الطلاب .. علامة إستفهام كبيرة و جنبها علامة تعجب أكبر وهما ماسكين جدول المواد بالمواعيد و كله متعارض مع كله ومش عارفين يسجلوا إيه !!
قبل الاختبارات ولما ينزلوا الجدول المقترح .. بتشوف مهازل عجيبة .. 4 أو 5 مواد نازلين في يوم واحد وفي معاد واحد وفي مكان واحد !!! .. ونقدم تعارضات و الجدول يتغير على اقل تقدير 5 مرات لحد ليلة الامتحان ممكن يتغيرعادي .. ولازم نبقى على إطلاع بأي تحديث يحصل على الجدول و ده مسؤليتك طبعاً .. المفروض يقدموا خدمة الإشتراك في خدمة تنبيهات الجدول على الميل و الموبايل عند حدوث اي تعديل !!
الدكاتره و الموظفين بيعاملو الطلاب على أنهم كائنات من نوع أخر .. بس مش قادر لحد دلوقتي أحدد النوع ده بس اللي متأكد منه ان النوع ده مش “ البشر “
مدرجات ومعامل الكلية غير صالحة للإستخدام الأدمي !!
كافتيريا الكلية بقت مكان .. ( للهئ و المئ ) على رأي أحمد السقا .. و العجيب ان في شباب بيجوا من بيوتهم مخصوص عشان يقعدوا في الكافتيريا !!
مكتبة الكلية .. مش عارف دي مكتبة بجد ولا إيه .. الشئ الممتاز جداً .. إن موظفين المكتبة مابيسمحوش بأي صوت جوه المكتبه .. بس ماتفتكرش ان المكتبه هتبقى هادئة لانك هتسمع بقى الموظفين نفسهم وهما بيتكلمو مع بعض بصوت عااااااااااالي وضحك !!
بندرس في الكلية مواد حاسب منتهية الصلاحية !! .. ولو انت في شعبة مختلطة مثلا رياضيات وحاسب او فيزياء وحاسب .. هتقعد الأربع سنين تسأل نفسك هما أمتى الفرعين دول هيلتقوا و احس انهم بيكملوا بعض ؟؟ ولو مابيكملوش بعض يبقى بدرسهم مع بعض ليه ؟؟
طلاب علوم من الذكور بينطلبم في الجيش ظباط 3 سنين !!
كلمة النشاط الطلابي في الكلية عندنا معناها .. حفلات .. على أساس انها بتظهر المواهب الشابه !!
لو جيت تعمل نشاط طلابي محترم .. لازم تشوف الويل و العذاب .. تصاريح و تخاريص و تمضي الورق من أكثر من جهة و أكثر من مسئول .. طول ما في مكان في الورقة أبيض مفهوش أمضى .. أعرف إن الإجرائات لسه مخلصتش !
الكلية أكبر مثال على الروتين و الكوسة المنتشرين في البلد … لما تيجي تعمل نشاط معين او حاجة يقلولك ضد اللائحة مع ان أغلب قرارتهم مش ضد اللائحة بس دا يمكن ضد الدستور
مش عارف مين العبقري اللي جمع كليات زي ( الطب و الهندسة و حاسبات و علوم و أداب و تجارة و حقوق ) في منطقة واحدة !! .. الزحااام بيبقى رهيب و المواصلات بتبقى ماشاء الله مفيش أحسن من كده .. نظام شعبطه .. إذا لحقت .. بس بفكر أجيب توكتوك عشان أستريح من المواصلات
لازم الظابط بتاع الأمن يوقفني كل يوم و يشوف شنطة اللاب ويفتحها .. لحد مره ما اتخنقت وقلتله ” مجبتش المتفجرات معايا النهرده ” وكويس انه كان راجل طيب و يومها عدا على خير
مفيش أي خبر أو قرار إسمه نهائي إلا لما يبدأ يتنفذ .. يعني لو كنت واقف مع اي حد من إدارة الكلية وقال هنعمل كذا وكذا .. وواحد زميلك سألك بعدين هما يعملوا إيه قله .. أنا سمعته قال كذا وكذا بس مش متأكد
مجموعة كبيرة من زملائي فاكرني هبقى معيد و بيقولولي يا دكتور الغلابة مش فاهمين انها علاقة عكسية .. يعني الطالب اللي شغال وظاهر مبيتعينش غفير حتى .. لكن اللي نايم مع نفسه و قاعد يحفظ ويصم .. دول اللي بيتعينتوا !!
أنا تعبت .. كفاية كده لتعقد من الكلية ولا حاجة
بحبها لأنها :
بدرس في شعبة الحاسب .. ولو بندرس حتى نظام Dos هيبقى افضل بالنسبة ليا من أني أدرس محاسبة ولا تاريخ الشعر في الجاهلية ولا أي تخصص تاني ..
فيها اساتذة بعتز بمعرفتهم .
فيها زملائي و أصدقائي اللي بحبهم و بعتز بصداقتهم جداً .
فيها مجموعة Computality .. اللي ساهمت في تأسيسها و اللي من خلالها بحاول أفيد غيري و بعمل شئ بحبه .
الموضوع مفتوح لكل الطلاب يشاركونا باللي يكرهوه وبيحبوه في كلياتهم .. خصوصاً طلاب كليتي العزيزة .. وربنا يستر علينا و عليكم
أول مره أعرف عن لقاءات هواه التقنية كان عن طريق تويتراية لحازم خالد .. بعدها شوفت الجروب الخاص بيها على جوجل و بعض الصور للقاءات السابقة .. في رمضان اللي فات وصلني دعوه من حازم عن طريق الفيس بوك لحضور السحور الجماعي لهواة التقنية .. لكن لأني مش من سكان القاهرة فكان من الصعب أني أحضر … لكن في أخر رمضان وصلني دعوة تانية من حازم ( الراجل ده موجب معانا جامد ) لركوب الخيل الجماعي لهواة التقنية في العيد وبعد ركوب الخيل بيبقى في لقاء لتناقش أمور تقنية .. و بما أننا في العيد و اللقاء بدري من أول اليوم قررت الحضور و نسقت مع حازم عشان أقابله في مكان أكون عارفة عشان ماتوهش في القاهرة بس
في الصباح التقيت بحازم .. أعرف حازم عن طريق النت من زمان ومؤخراً لما بدأ يستخدم تويتر تعرفت عليه أكثر لكن اللي فاجئني أني كنت متوقعه أكبر من كده بكتيييير .. طلع أكبر مني بحاجة بسيطة على عكس ماتوقعت و قابلت أحمد توفيق و ياسر سبيد ودي المره الأولى اللي أتعرف عليهم …. كنت أتوقع أن يكون العدد أكبر .. من خلال الصور اللي شفتها للجروب بيبقوا خماشر ثمناشر واحد بس قلت يمكن خايفين يركبوا خيل و الشباب قالوا في ناس هتيجي على اللقاء مباشرة بعد ركوب الخيل …
من أصعب الأشياء أنك تكون مشرف على تشطيب بيت و تكون ملزم أنك تتعامل مع العُمال و طبعاً لازم تكون متواجد معاهم معظم الوقت .. تخيل بقى كم الوقت الضائع في حاجة زي كده .. أخوكم و للأسف من سنتين أتحط في الموقف ده .. الإشراف على تشطيب بيتنا الجديد … فقررت ألاقي حاجة استغل بيها الوقت الضائع ده .. طبعاً ماينفعش أخذ اللاب توب في مكان ولا فيه كهرباء و لا نت .. و أيامها مكنتش مرتبط بمشاريع أو شغل ولا حتى تدوين .. كنت لسه حر
فكانت الفكرة أني أعمل نافورة مياه أحطها في مدخل البيت خصوصاً لما لقيت أن أسعارها فوق 2000 جنيه !!!!
كالعادة لازم أرسم المشروع على الورق .. و بعد ما حددت كل حاجة بدأت في الشغل .. أخذت مكان في البيت و عملته ورشة للأسطى فؤش ومحدش عارف أنا بعمل ايه .. قالوا باصنع صاروخ .. أهم حاجة أنها مكلفتنيش حاجة – اللهم إلا حاجات بسيطة جداً - لأني إستغليت أشياء كانت متوفرة عندي مش مستخدمة بالإضافة أني كنت بستغل الخامات اللي كنت بشتريها لشغل البيت .. الشغل عليها أخذ وقت طويل لحد ما خلصتها .. كالعادة الكسل سبب رئيسي في التأخير بس الحمد لله خلصتها في الأخر و ان كانت لحد دلوقتي ناقص أني أركب الإضاءة بتاعتها
سيقام احتفال بيوم حريةالبرمجيات لمدة أسبوعين أبتداءا من الأول من سبتمبر في كليةالهندسة جامعة الإسكندرية .
ويوم حرية البرمجيات هو احتفال عالمي و تعليمي الهدف الأساسي من وراء هذه الاحتفالية هي تشجيع مستخدمي الحاسب للتعرف على البرمجيات الحرة ذات المصدر المفتوح بالإضافة إلى التعرف على المجتمعات التي تقوم بتطويرها و نشرها حول العالم و علي كيفية المشاركة في هذه المجتمعات .
بإذن الله هحاول أحضر بكره اولى فعاليات الحدث .. المشكلة اني ماروحتش إسكندرية من رابعه إبتدائي يعني الواحد هيلطش لما يشبع ..
للأسف مش هقدر احضر كل فعاليات الحدث على مدار الأسبوعين لأني بعيد عن الأسكندرية لكن إن شاء الله هحاول أحضر معظمها ..
هحدث التدوينةعلى مدار الأسبوعين لأضيف الايام اللي هحضرها ..
يلا أشوفك هناك
تحديث : حضرت النهارده اولى فعاليات الحدث .. الوصول للمكان مكنش صعب لكن الصعب كان الدخول .. لفيت على ابواب الكلية كلها وكل حراس الأمن يقولوا مؤتمر إيه ؟؟ ومعندناش تعليمات عن حاجة زي كده ؟ حتى عند الباب اللي كان موضح في رساله المنظمين الموجود في شارع لطفي السيد .. المهم بعد مداولات دخلنا الحمد لله و أعتذر حارس الامن .. كان في تخبط في التنظيم لان الكلية فيها تصليحات صراحة مقدرش ألوم الشباب المنظمين لاني عارف معنى انك تنظم حدث في كليه يعني ايه وحصلت معايا كتير في الفعاليات اللي بنظمها في Computality .. الاول كان في تعريف بالحدث و الجدول الخاص بيه و بعدين محاضرة عن فكر المصادر المفتوحة .. لكن التنظيم و الفعاليات النهارده مكنتش في المستوى اللي كنت متوقعه و أتمنى ان باقي الفعاليات تكون أفضل ..
عندما سمعت عن الأغنية أول ما لفت نظري هو إسم محمد رجب .. ومن منا لم يسمع بإسم محمد رجب أو يقرأ إسمه على بوستر أو إعلان دعوي .. لم أكن أعرف عنه الكثير كشخص … فقط أعرفة من خلال رسوماتة و تصاميمه الدعوية المبدعه و التي بت أعرفها من مجرد رؤيتها من بعيد لأقترب أكثر لا لأبحث عن إسم من صممها بل لأبحث تحديداً عن إسم محمد رجب .. كنت أعتقد أنه شخص كبير في العمر ولكن عندما دخلت موقعه بالأمس وشاهدت صورته و جدته شاب في مقتبل العمر .. أتمنى من الله عز وجل أن يبارك له و يجزيه خيراً و ينفع به الإسلام و المسلمين ..
طرحت أغنية You Came To Me بشكل مجاني في موعدها يوم 18 من هذا الشهر عبر موقع سامي يوسف .. و منذ قليل فقط تم الاعلان عن الفيديو كليب الخاص بهذه الأغنية .. أعتقد ان هذا هو الفيديو كليب الاول لسامي يوسف مع شركة الإنتاج الجديدة ETM International بعد إنفصاله عن شركة Awakening … لكن لم اعثر على موقع هذه الشركة او أي اعمال أخرى من انتاجها !! .. الفيديو أكثر من رائع .. أعجبني كثيراً .. حسناً اترككم معه
كل عام وأنتم بخير بمناسبة حلول شهر رمضان الكريم اعاده الله علينا وعليكم وعلى الامة الاسلامية بالخير و اليمن و البركات . وتقبل الله منا ومنكم صالح الاعمال .
الواحد سعيد أن مصر و السعودية و أغلب الدول اتفقت على بداية رمضان .. طبعاً كالمعتاد لازم تكون ليبيا مختلفة عن الجميع .. و سعيد أكثر أن مفيش دراسة في رمضان يعني الحمد لله مش مضطرين نروح الكلية و بالتالي هنحافظ على صيامنا
لكن الشئ المزعج أن الساعة النهاردة هتتغير .. طول عمري بكره موضوع تغيير الساعه ده .. و بخصوص تغيير الساعه قبل رمضان فمن يومين سمعت تعليق غريب جداً .. واحد كان متضايق جدا من الحكومة و بيقول حرام عليها هتغيير الساعه قبل رمضان عشان نصوم ساعات اقل .. أسيبك تفكر في الجملة
من السمات و المظاهر اللي بتسبق قدوم الشهر الفضيل .. تعليق الزينة و الأنوار و الفوانيس في الشوارع .. صراحة مبدأتش في الموضوع ده إلا من السنة اللي فاتت بس … بعد إنتقالنا لبيت جديد و طبعا معظم حياتي كانت في السعودية فمكنتش بشترك في حجات زي كده .. بس الموضوع جميل جداً .. تلاقي الكل بيشارك في تجهيز المساجد و تزيين الشوارع قدمها .. النهارده علقنا الفانوس قدام بيتنا .. ودي صور حصرية لفانوس بيتنا و اسف على الدقة المتدنية .. تصوير بالموبايل أكمل قراءة التدوينة »
.. يوم السبت يبدأ العام الدراسي الجديد … خلينا أقولكم انا بكره ايه في كليتي وبحب فيها ايه ..
و قابلت 
